Bakıda “Azərbaycanda NATO həftəsi”nə start verilib. Həftə çərçivəsində dünən keçirilmiş ilk tədbirdə çıxış edən Türkiyənin Azərbaycandakı səfiri Hulusi Kılıç 21-ci əsrin yeni problemlər yaratdığını bildirib. Əsas problemi isə hərbi məsələlərin təşkil etdiyini deyən diplomat hazırda gündəmdə terrorizmin olduğunu söyləyib.

“Azərbaycanın NATO-ya üzvlüyü məsələsi gündəmdə deyil”. APA-nın məlumatına görə, bu sözləri NATO-nun Əməliyyatlar Bölməsinin Planlaşdırma şöbəsinin rəhbəri Dieqo Ruis Palmer deyib.

ATƏT-in insan alverinə qarşı mübarizə üzrə xüsusi nümayəndəsi və koordinatoru Yeva Biaudet Azərbaycanda səfərdədir. APA-nın məlumatına görə, tanışlıq xarakteri daşıyan səfər iyunun 20-dək davam edəcək. Yeva Biaudet Azərbaycanda traffikinqə qarşı mübarizənin təşkili ilə tanış olacaq və ATƏT-in Bakı Ofisinin tədbirlərində iştirak edəcək.

“Müxalifətin prezident seçkilərini həm boykot etməsinin, həm də bu seçkilərdə iştirakının perspektivi yoxdur. Üçüncü bir yol olmadığından bu iki pis variantın içərisindən az da olsa yaxşısı seçilməlidir”. Bu fikirləri APA-ya açıqlamasında Azərbaycan Xalq Cəbhəsi Partiyasının (AXCP) Ali Məclisinin sədri Qulamhüseyn Əlibəyli deyib. Onun sözlərinə görə, blokda seçkilərdə iştiraka tərəfdar olanlar da var.