Martın 31-də İqtisadi Təşəbbüslərə Yardım İctimai Birliyi bələdiyyələrin maliyyə vəziyyəti ilə bağlı 2008-ci il üzrə apardığı tədqiqatın nəticələrini açıqlayıb. «APA-Economics»in məlumatına görə, bununla bağlı keçirilən tədbirdə birliyin rəhbəri Rövşən Ağayev 2008-ci il üzrə Azərbaycanda fəaliyyət göstərən bələdiyyələrin maliyyə vəziyyəti ilə bağlı geniş təqdimatla çıxış edib.
R.Ağayevin sözlərinə görə, ötən il ərzində Azərbaycanda bələdiyyə büdcələrinin faktiki daxilolmaları 43,077 mln. manat təşkil edib və 2007-ci ilin yekunları ilə müqayisədə azalma müşahidə olunub. Belə ki, Bakı şəhəri üzrə bələdiyyələrin büdcə gəlirləri 2008-ci il ərzində 30%, Sumqayıtda 40,4%, Gəncədə isə təxminən 3 dəfə azalıb.
Aparılan tədqiqat göstərib ki, yerli büdcə gəlirlərinin proqnozlaşdırılan məbləği 75,093 mln. manat, adambaşına düşən yerli büdcə gəlirləri isə 4,9 manat olub. Həmçinin, bələdiyyələr üzrə büdcə gəlirlərinin strukturunda vergi daxilolmalarının həcmi 29,2% artaraq 11,547 mln. manat, o cümlədən torpaq vergisi üzrə gəlirlər 0,9% artaraq 7,044 mln. manat, tikinti materialları və mədən vergisi üzrə 2,5 dəfə artaraq 1,079 mln. manat, küçə reklamları üzrə daxilolmalar isə 32,5% ataraq 91,3 min manata çatıb. Eyni zamanda, yerli büdcə üzrə faktiki xərclər 47,528 min manat təşkil edib. Xərclərin tərkibində vəsaitlər əsasən yerli özünüidarə orqanlarının və yerli əhəmiyyətli yolların saxlanılmasına və ərazilərin abadlaşdırılmasına ayrılıb.
Sonda R.Ağayev bələdiyyələrin statusunun artırılması və yerli büdcələrin dövlət tərəfindən maliyyələşdirilməsi üçün İctimai Birlik tərəfindən üç alternativ təklifin hazırlandığı bildirib. Bura transfertlərin həcminin artırılması, məqsədli büdcə transfertlərinin tətbiqi yolu ilə dövlət tərəfindən maliyyə yardımının göstərilməsi və məqsədli büdcə transfertlərinin verilməsi ilə paylı vergi sisteminin tətbiqi daxildir./APA/