Bu gündən etibarən Bakı Metropoliteninin «Məşədi Əzizbəyov» stansiyasına sərnişinlərin giriş və çıxışı tam məhdudlaşdırılıb. «APA-ECONOMICS»in məlumatına görə, məhz bununla əlaqədar qatarlar «Məşədi Əzizbəyov» stansiyasında dayanmadan hərəkət edir. Stansiyaya sərnişinlərin giriş və çıxışının məhdudlaşdırılması yenidənqurma işləri ilə bağlıdır. Stansiya dekabr ayında təkrar istifadəyə açılacaq və həmin vaxtadək sərnişinlərin giriş və çıxışı məhdudlaşdırılacaq.
Qeyd edək ki, stansiyada aparılacaq yenidənqurma işləri nəticəsində keçidin yeri dəyişdiriləcək, daxili interyer yenilənəcək, tavan 6 metr 45 sm hündürlüyündə olacaq, həmçinin yeni giriş və çıxışlar açılacaq.
Xatırladaq ki, məhdudiyyətlərlə əlaqədar son dayanacağı «Məşədi Əzizbəyov» stansiyasının qarşısı olan avtobus marşrutlarının sxemində də dəyişiklik edilib. Dayanacaqlar müvəqqəti olaraq metronun «Ulduz» stansiyasının qarşısına köçürülüb. /APA/