Elxan Süleymanov: “Sərsəng su anbarı ilə bağlı problem ermənilərin bizə qarşı soyqırım siyasətinin tərkib hissəsidir”

Sərsəng su anbarı ilə bağlı beynəlxalq təşkilatlara ünvanlanan müraciətlərin təqdimatı keçirilib
Anjey Kaspşik Dağlıq Qarabağa gəlib
Kanadanın Xarici İşlər, Ticarət və İnkişaf Departamenti: Kanada Azərbaycanın ərazi bütövlüyünü tanıyır

“Sərsəng su anbarı ilə bağlı problem ermənilərin bizə qarşı 1905-ci ildən bəri yürütdükləri soyqırım siyasətinin tərkib hissəsi kimi qəbul edilməlidir”. APA-nın məlumatına görə, bu barədə Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) prezidenti, millət vəkili Elxan Süleymanovun yaydığı bəyanatda qeyd olunub.

E. Süleymanov bildirib ki, AVCİYA-nın fəaliyyətində prioritet istiqamətlərdən biri ermənilərin Azərbaycan xalqına qarşı sistemli və davamlı şəkildə həyata keçirdiyi soyqırım cinayətləri, Ermənistanın Azərbaycana qarşı silahlı təcavüzü, işğal altında olan ərazilərdə xalqa qarşı həyata keçirdiyi etnik təmizləmə siyasəti, müharibə cinayətləri, insanlığa qarşı cinayətlər haqqında həqiqətlərin dünya ictimaiyyətinə çatdırılmasıdır: “AVCİYA mart ayının 28-də ermənilərin azərbaycanlılara qarşı başladıqları soyqırım siyasətinin 110 illiyi ilə əlaqədar yeni layihəsini elan etdi. Bu layihənin əsas məqsədi erməni millətçilərinin, erməni silahlı birləşmələrinin 1905-ci ildən başlayaraq azərbaycanlılara qarşı düşünülmüş, planlaşdırılmış və sistemli şəkildə silahlı basqınlar, kütləvi qırğınlar və soyqırım cinayətləri həyata keçirdiklərini dünya ictimaiyyətinə çatdırmaqdan ibarətdir. Təkcə 1905-1907-ci illərdə ermənilər genişmiqyaslı qanlı əməliyyatlar həyata keçirərək azərbaycanlılara məxsus yüzlərlə yaşayış məntəqəsini yerlə yeksan edib, on minlərlə azərbaycanlını vəhşicəsinə qətlə yetiriblər. Ermənilərin azərbaycanlılara qarşı həyata keçirdikləri qanlı əməliyyatlar və soyqırım sonrakı dövrlərdə də davam etdirilib və bu qanlı cinayətlər Cənubi Qafqazın etnik azərbaycanlılara məxsus olan bütün yaşayış məntəqələrini əhatə edir”.

E. Süleymanov bildirib ki, tarixi Azərbaycan torpaqlarında Ermənistan dövləti yaradıldıqdan sonra isə soyqırım siyasəti Ermənistan dövləti səviyyəsində davam etdirilib. Ermənilərin törətdikləri soyqırım cinayətləri nəticəsində son yüz il ərzində 2 milyondan artıq azərbaycanlı xüsusi qəddarlıqla qətlə yetirilib və öz tarixi torpaqlarından didərgin salınıb: “Dünya erməniləri 2015-ci ildə Osmanlı dövlətində onlara qarşı guya həyata keçirilmiş qondarma soyqırımın 100 illiyini qeyd etməyə hazırlaşırlar. Bizim layihənin əsas məqsədlərindən biri də ermənilərin bu iddialarının saxta olmasını, onların 100 il əvvəl heç bir soyqırıma məruz qalmadıqlarını, əksinə, ermənilərin 110 il əvvəl Azərbaycan xalqına qarşı soyqırım cinayətləri həyata keçirməyə başladıqlarını dünya ictimaiyyətinə çatdırmaqdan ibarətdir. Bir sözlə, bizim əsas məqsədimiz ermənilərin 100 ildir davam edən yalanını və riyakarlığını darmadağın etmək, ermənilərin soyqırıma məruz qalmış xalq olmadığını, əksinə, Azərbaycan xalqına qarşı soyqırım cinayətləri törətdiklərini dünya ictimaiyyətinə çatdırmaqdır. Artıq bir aydır layihə çərçivəsində “1905.az” saytı fəaliyyət göstərir, saytda mövzu ilə bağlı sənədlər, elmi araşdırmalar, tanınmış mütəxəssislərin tədqiqat və müsahibələri yerləşdirilib. Layihə çərçivəsində müxtəlif dillərdə kitabların nəşr edilməsi, beynəlxalq konfransların keçirilməsi, mütəmadi olaraq dünya mətbuatında məqalələrin yerləşdirilməsi nəzərdə tutulur”.

E. Süleymanov qeyd edib ki, indiyə qədər həyat mənbəyi hesab edilən su Ermənistan dövləti tərəfindən Azərbaycan xalqına qarşı silah kimi istifadə edilir: “23 ildən artıq işğal altında qalmış Sərsəng su anbarı 6 cəbhəyanı rayonda məskunlaşmış 400 000 mülki əhali üçün real təhlükə mənbəyinə çevrilib. Ermənistan hakimiyyətinin bu su anbarının yüksəklikdə yerləşməsindən istifadə edərək istənilən an planlı və düşünülmüş şəkildə cəbhəyanı zonada azərbaycanlı əhalini kütləvi şəkildə məhv etmək məqsədilə silah kimi istifadə edəcəyi şübhə doğurmur. Ermənistanın sudan Azərbaycana qarşı silah kimi istifadə etməsi bu günlərdə daha parlaq şəkildə öz təsdiqini tapdı. Belə ki, 23 apreldə Ermənistan Milli Elmlər Akademiyasının illik hesabatında erməni akademik Ruben Crbaşyan Sevan gölünün vacib “siyasi” və “strateji” əhəmiyyəti haqqında danışaraq, deyib: “Sevan gölündən axan suyun 20-30%-i öz ərazilərimizdə istifadə edilir, qalan 70% isə Naxçıvana yönəldilir”. Ermənistanın prezidenti Sərkisyan təəccüblənərək akademikin dediklərinə  cavab olaraq deyib: “Bilin ki, Sevandan bir damla da su Azərbaycana getmir”. Mən  coğrafiya elmləri doktoru, professor Çingiz İsmayılovdan Sevan (Göyçə) gölündən Naxçıvana suyun axıb-axmaması məsələsinə aydınlıq gətirməyi xahiş etdim. O bildirdi ki, Sevan gölündən Naxçıvana heç bir çay axmır. Ümumiyyətlə, Ermənistandan Naxçıvana yalnız Arpa çay axır və onun suyunun çox hissəsi tunel vasitəsi ilə Sevana yönəldilib. Hesab edirəm ki, AŞPA-da Sərsəng su anbarı ilə bağlı məruzəçinin təyin ediləcəyi ərəfədə Ermənistan tərəfinin belə təxribat xarakterli məlumat yayması təsadüfi deyil. Maraqlıdır ki, bir neçə gün əvvəl Ermənistan KİV-də Sərsəng su anbarı ilə bağlı məruzəçinin təyin edilməsi məsələsinin gündəmdə olmadığı haqqında da yalan məlumat yayılıb. Yeri gəlmişkən, 24 apreldə ermənilər növbəti dəfə qondarma soyqırım hadisələrinin ildönümünü qeyd etdilər. Bununla bağlı vurğulamaq istərdim ki, ermənilər soyqırıma məruz qalmış xalq deyil, soyqırım törədən xalqdır. Digər tərəfdən, Türkiyə Cümhuriyyəti 1915-ci il hadisələrinin elmi şəkildə araşdırılması üçün ortaq tarixi komissiya yaradılması haqqında çağırış edib və bu çağırış hələ də qüvvədədir. Türk, erməni və beynəlxalq tarixçilərdən ibarət ortaq komissiyanın yaradılması 1915-ci il hadisələrinin obyektiv qiymətləndirilməsində önəmli rol oynaya bilər. Əfsuslar olsun ki, erməni tərəfi belə bir səlahiyyətli ortaq komissiyanın yaradılmasına ehtiyac olmadığını bildirir və bununla da məsələnin obyektiv həllində maraqlı olmadığını bir daha sübuta yetirmiş olur”.