Milli parklarda “Təbiəti dərk et-əylən” tipli guşələr yaradılacaq

Avropa Parlamentinin üzvləri Xocalı soyqırımı ilə bağlı bəyanat veriblər
Azərbaycan Prezidenti İlham Əliyev Türkiyəyə işgüzar səfərə gəlib
Ermənistan silahlı qüvvələrinə məxsus kvadrokopter məhv edilib

Bu il milli parklarda uşaqlar üçün “Təbiəti dərk et-əylən” tipli guşələr yaradılacaq. Həmin guşələrdə uşaqlar üçün interaktiv, məntiqi, müxtəlif məzmunlu təbiətə aid oyunların keçirilməsi nəzərdə tutulub. Məqsəd gənc nəslin, uşaqların milli park ərazilərində vaxtlarını daha səmərəli və maraqlı keçirmələrinə və təbiətlə bağlı daha çox məlumat əldə etmələrinə nail olmaqdır. Qızılağac Milli Parkında artıq belə guşələr mövcuddur. Bundan əlavə, milli parklara gələn turistlərin qida və su ehtiyacının qarşılanması üçün də xüsusi yerlərin ayrılması nəzərdə tutulub. Belə ki, həmin yerlərdə turistlərə fast-fudlar və su veriləcək.

AZƏRTAC xəbər verir ki, bu barədə Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktoru Hikmət Əlizadə məlumat verib.

“Azərbaycanda turistlər ən çox Göygöl Milli Parkına maraq göstərirlər. Həmin milli park yeni açılanda bir turizm mövsümü ərzində oranı 180-200 min nəfər ziyarət edib. Lakin digər milli parkların da imkanları Göygöl Milli Parkından geri qalmır və onlara da maraq getdikcə artır. Ötən il milli parklara gələn ziyarətçilərin sayında artım qeydə alınıb. Hər bir milli parkın yerləşdiyi ərazidən asılı olaraq oranın biomüxtəlifliyi də müxtəlifdir. Nümunə üçün deyə bilərik ki, Şirvan Milli Parkı daha çox ceyranlarla məşhurdur. Hazırda bu milli parkda ceyranların sayı 9 minə çatır”, – deyə H.Əlizadə qeyd edib.

Departament direktoru qoruqlarda vəhşi təbiətin müşahidəsi üçün infrastrukturun quraşdırılacağını və işlərin yaya qədər yekunlaşacağını bildirib. Bu zaman turistlər qoruqlara daxil olmadan xüsusi müşahidə məntəqələri vasitəsilə həmin qoruğun bitki və heyvanat aləmi ilə tanış ola biləcəklər. Lakin bu, bütün qoruqlarda mümkün olmayacaq.

O, yasaqlıqların mülkiyyətinin nazirlikdə olmadığını, lakin həmin ərazilərin də bitki və heyvanat aləminin mühafizəsinə nəzarət etdiklərini diqqətə çatdırıb.

Qeyd edək ki, 3 mart – Dünya Vəhşi Təbiət Günü ilə əlaqədar milli parklarda “açıq qapı” günü elan olunub. Bu gün bütün milli parklarda ziyarətçilər giriş haqqından azaddırlar. “Açıq qapı” günü səhər saat 09:00-dan saat 18:00-dək davam edəcək.