Fövqəladə Hallar Nazirliyi Azov dənizində qəzaya uğramış gəmidə xilas edilən Azərbaycan vətəndaşları ilə bağlı məlumat yayıb. Trend-in nazirliyin rəsmi saytına istinadən verdiyi məlumata görə, fevralın 7-də Bakı vaxtı ilə saat 07:40 radələrində Azov dənizində olan "Avaca 1" yük gəmisindən həyəcan siqnalının verilməsi barədə məlumat daxil olub. Ukrayna Fövqəladə Hallar Nazirliyinə istinadən yayılan məlumata görə, gəminin 12 heyət üzvündən 8 nəfəri Azərbaycan, 1 nəfəri Türkiyə, 3 nəfəri isə Ukrayna vətəndaşıdır.

Ukrayna Fövqəladə Hallar Nazirliyinin Böhran Vəziyyətlərində İdarəetmə Mərkəzindən alınan məlumata əsasən, görülmüş tədbirlər nəticəsində gəminin heyət üzvləri, o cümlədən 8 nəfər Azərbaycan vətəndaşı xilas olunub.

Xilas olunmuş azərbaycanlı dənizçilər Simferopola aparılıb. /Trend/