“Mən hiss edirəm ki, bu məsələdə konsensus var”. APA-nın Fransanın “Figaro” qəzetinə istinadən verdiyi məlumata görə, bunu parlamentlə əlaqələr üzrə Fransa hökumətinin üzvü Patrik Olye (Patrick Ollier) uydurma “erməni soyqırımı”nın inkarına görə cinayət məsuliyyəti nəzərdə tutan qanun layihəsinin Senatda mümkün təsdiqini şərh edərkən deyib. Fransalı nazir bildirib ki, yanvarın 23-də Fransa hökuməti Valeri Boyerin müəllifi olduğu müvafiq layihənin Senatın gündəliyinə salınmasını dəstəkləyəcək. Patrik Olye qanun layihəsinin yanvarın 16-da Senat rəhbərliyinin iclasında müzakirə edilməsini də təklif edib.
Xatırladaq ki, 2011-ci il dekabrın 22-də Fransa Milli Assambleyası “erməni soyqırmı”nın inkarına görə cinayət məsuliyyətini nəzərdə tutan qanun layihəsini qəbul edib. Türkiyə bu addımı kəskin şəkildə pisləyib.