Kaliforniyanın Los-Anceles şəhərində Amerika Azərbaycanlıları Şurası, Amerika Yəhudi Komitəsi və Türk Amerika Assosiasiyası birlikdə «Körpülərin qurulması-Xəzər dənizindən Aralıq dənizinədək Azərbaycan, Türkiyə və İsrailin Baş Konsulları ilə Dialoq» mövzusunda konfrans keçirəcəklər. Xaricdə Yaşayan Azərbaycanlılarla iş üzrə Dövlət Komitəsindən cümə axşamı verilən məlumata əsasən, noyabrın 6-da keçiriləcək tədbirdə hər üç ölkənin Los Ancelesdəki Baş konsulları Elin Süleymanov, Hakan Tekin və Jakob Dayan iştirak edəcəklər.

Məlumatda həmçinin bildirilib ki, dekabrın 6-da Amerika Azərbaycanlıları Şurası və Azərbaycanın Los-Ancelesdəki Baş Konsulluğunun birgə təşkilatçılığı ilə Kaliforniyanın İrvin Universitetində ənənəvi «III Amerikalı Azərbaycanlıların Akademik Bilik Forumu» keçiriləcək. Tədbirdə Azərbaycanın türk köku və tarixi, çoxtərəfli ABŞ-Azərbaycan münasibətləri, Qafqazda siyasi və regional münaqişələr, eyni zamanda enerji təhlükəsizliyi, iqtisadi və texnoloji məsələlər müzakirə olunacaq. /Trend/