ƏHALİ

Azərbaycan əhalisinin sayı ilin əvvəlindən 57 min 269 nəfər və ya 0,6 faiz artaraq bu il sentyabr ayının 1-i vəziyyətinə 9 milyon 867 min 250 nəfərə çatıb.

Dövlət Statistika Komitəsindən AZƏRTAC-a bildirilib ki, əhalinin bir kvadratkilometrə düşən sıxlığı 114 nəfər olub. Əhalinin ümumi sayının 53 faizini şəhər, 47 faizini kənd sakinləri, 49,9 faizini kişilər, 50,1 faizini isə qadınlar təşkil edir. Hazırda hər 1000 kişiyə 1006 qadın düşür.

Cari ilin yanvar-avqust ayları ərzində Ədliyyə Nazirliyinin rayon (şəhər) qeydiyyat şöbələri tərəfindən ölkədə 95 min 395, yaxud hər gün orta hesabla 393 doğulmuş körpə qeydə alınıb və əhalinin hər 1000 nəfərinə bu göstərici 14,7 təşkil edib. Doğulan körpələrin 53 faizi oğlan, 47 faizi isə qız uşaqlarıdır. Doğulanlardan 1712-si əkiz, 33-ü üçəmdir. Doğulan körpələr üçün 75,2 yaş, o cümlədən oğlanlar üçün 72,8 yaş, qızlar üçün 77,6 yaş ömür uzunluğu gözlənilir.

Hazırda ölkədə əhalinin təkrar istehsalı təmin olunaraq uşaq doğmaq qabiliyyətinə malik olan hər bir qadına bütün ömrü boyu 2 uşaq düşür.

Cari ilin yanvar-avqust ayları ərzində ölkədə 39 min 4 ölüm halı qeydə alınıb və bu göstərici əhalinin hər 1000 nəfərinə 6 təşkil edib.

Bu ilin 8 ayı ərzində qeydiyyat şöbələri tərəfindən 40 min 256 nikah və 9 min 787 boşanma halları qeydə alınmış və əhalinin hər 1000 nəfərinə nikahların sayı 6,2, boşanmaların sayı isə 1,5 olub.

Cari ilin yanvar-avqust ayları ərzində Daxili İşlər Nazirliyi və Dövlət Miqrasiya Xidmətinin müvafiq qurumları tərəfindən daimi yaşamaq üçün 2 min 80 nəfər Azərbaycana gələn, 1202 nəfər isə Azərbaycandan gedən qeydə alınaraq, miqrasiya saldosu müsbət 878 nəfər təşkil edib.

***

2011-cü ilin əvvəlinə Azərbaycan Respublikasının əhalisi 9 111.1 min nəfər, o cümlədən 4 829.5 min nəfər və ya 53.0%-ni şəhər və 4 281.6 min nəfər və ya 47.0%-ni kənd sakinləri təşkil etmişdir. Ölkə əhalisinin ümumi sayından 4 milyon 519 min nəfəri, yaxud 49.6 % kişi, 4 milyon 602 min nəfəri və ya 50,4 % qadınlardır.

Əhalinin yaş strukturu aşağıdakı kimi səciyyələnir: əhalinin ümumi sayından 23%-i 0-14 yaşda, 71%-i 15-64 yaşda, 6%-i isə 65 və yuxarı yaşda olanlardır. Əhalinin 29%-i 18-34 yaşda olan gənclərdir, onların yarıdan bir qədər çoxu şəhər yerlərində yaşayır.

Əhalinin orta yaşı 31 yaş təşkil edir.

Ölkə əhalisinin 86,6 % azərbaycanlılar, 2,2 % ləzgilər, 1,8 % ruslar, 1,5 % ermənilər, 5,0 % talışlar, 0,6 % avarlar, 0,5 % türklər, 0,4 % tatarlar, 0,4 % ukraynalılar, 0,2 % saxurlar, 0,2 % gürcülər, 0,2 % kürdlər, 0,13 % tatlar, 0,1 % yəhudilər, 0,05 %udinlər, 0,12 % isə digər millətlərdir.

COMMENTS