“Sərsəng SOS: təhlükə altında qalan tarixi və mədəniyyət abidələri” kitabının təqdimatı keçirilib

ATƏT-in iclasında Azərbaycanın işğal olunmuş ərazilərində qeyri-qanuni fəaliyyətlə bağlı məsələ qaldırılıb
Bakıda “Erməni terroru Azərbaycan multikulturalizminə qarşı: 1918-2018” mövzusunda beynəlxalq konfrans keçirilib
Avronest PA-nın Büro iclasında Elxan Süleymanovun Bəyanatı 2 noyabr, Kiyev

Bu gün “Sərsəng SOS: təhlükə altında qalan tarixi və mədəniyyət abidələri” kitabının Azərbaycan, ingilis və fransız dillərindəki variantlarının təqdimatı keçirilib.

APA-nın məlumatına görə, kitab Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) “Sərsəng harayı” layihəsi çərçivəsində hazırlanıb.

Layihənin rəhbərləri AVCİYA prezidenti Elxan Süleymanov, AVCİYA vitse-prezidenti Vəli Əlibəyovdur. Kitabın müəllifləri isə tarix elmləri namizədi Məhərrəm Zülfüqarlı, sənətşünas Minaxanım Əsədova və arxeoloq, tarix elmlər namizədi Təvəkkül Əliyevdir.

Kitabda Sərsəng su anbarının təsir dairəsində olan Ağdam, Ağcabədi, Bərdə, Tərtər, Goranboy və Yevlax rayonları ərazilərindəki tarixi və mədəniyyət abidələrinin tədqiqatına dair hesabat əksini tapıb.

Təqdimatda çıxış edən V. Əlibəyov deyib ki, Sərsəng su anbarında hər hansı fəlakət olarsa, 4 min insan tələf olar, Ağdam, Ağcabədi, Bərdə, Tərtər, Goranboy və Yevlax rayonları ərazilərindəki tarixi və mədəniyyət abidələri məhv olar. O, həmçinin qeyd edib ki, Sərsəng su anbarı işğal altındadır və ermənilər bu su anbarından Azərbaycana qarşı hidroloji təhdid kimi istifadə edirlər.

Tədbirdə bildirilib ki, Sərsəng su anbarı ilə əlaqədar aparılan tədqiqatların nəticələri Avropa Şurası Parlament Assambleyasına çatdırılacaq, AŞ PA-nın Dağlıq Qarabağ və digər işğal olunmuş ərazilər üzrə məruzəçisinə də bu hesabat təqdim ediləcək.

Tədqiqat qrupuna rəhbərlik etmiş M. Zülfüqarlı tədqiqatın bu ilin may-iyun aylarında aparıldığını söyləyib. M. Zülfüqarlı həmin bölgələrdə çoxlu sayda kurqanların olduğunu nəzərə çatdırıb: “Anbarda qəza olacağı halda tək orta və müasir dövrə dair abidələrimiz yox, miladdan əvvələ aid kurqanlar da məhv ola bilər”.

O, tədqiqatlarda alman arxeoloqlarının da iştirak etdiyini açıqlayıb.