ŞAMOYEV Firuddin İsa oğlu

HÜSEYNOV Elşən İbrahim oğlu
MƏMMƏDOV Seymur Qəhrəman oğlu
QƏDİMƏLİYEV Arif Maasif oğlu

ŞAMOYEV Firuddin İsa oğlu (7.2.1962, Qazax ş. – 13.4.1992, Qazax r.-nunun Quşçu Ayrım) – Azərbaycanın Milli Qəhrəmanı (7.6.1992, ölümündən sonra).

1962-ci il fevral ayının 7-də Qazax şəhərində doğulmuşdur. Orta təhsilini Qazax şəhərində almışdır. 1981-83-cü illərdə Qazax rayon Hərbi Komissarlığının çağırışı ilə həqiqi hərbi xidmətdə olmuşdur. Ordudan tərxis olunduqdan sonra doğulduğu Qazax şəhərinə gələrək, Təmir-Tikinti İdarəsində çilingər kimi işə başlayır.

Ermənilərin 1988-ci ildən başlanan əsassız ərazi iddiaları, onların törətdiyi qanlı cinayətlər, Vətənin bütün qeyrətli oğulları kimi Firuddini də hədsiz dərəcədə hiddətləndirirdi. Dağlıq Qarabağda, eləcə də digər sərhəd bölgələrimizdə axıdılan günahsız qanlar ara vermirdi. Kəndlərimiz talan edilir, əhali təlaş içində yaşayırdı. F.Şamoyev 1991-ci il iyulun 8-də könüllülərdən ibarət dəstəyə yazıldı. O, 707 saylı hərbi hissənin minaatan bölüyünün komandiri vəzifəsinə təyin olundu. Cəsur komandir Qazax rayonunun Bağanıs Ayrım, Məzəm, Quşçu Ayrım və digər kəndlərinin müdafiəsində dəfələrlə iştirak etmiş, düşmənin atəş nöqtələrinin məhv edilməsində rəşadət göstərmişdi.

1992-ci il aprel ayının 13-ü… Quşçu Ayrım kəndi ətrafında gedən ağır döyüş… O, bu döyüşdə qəhrəmancasına həlak oldu.

Ailəli idi. Həyatda üç övladı yadigar qalıb.

Azərbaycan Respubikası Prezidentinin 7 iyun 1992-ci il tarixli 833 saylı fərmanı ilə Şamoyev Firuddin İsa oğluna ölümündən sonra “Azərbaycanın Milli Qəhrəmanı” adı verilmişdir.

Qazax şəhərində Şəhidlər Xiyabanında dəfn edilmişdir.

Qazax şəhərindəki orta məktəblərdən biri qəhrəmanın adını daşıyır.

Əd.: Vüqar Əsgərov “Azərbaycanın Milli Qəhrəmanları” (Yenidən işlənmiş II nəşr), Bakı, 2010, səh. 268