Təhsil Nazirliyi: “e-telebe.edu.az” elektron portalı vasitəsilə müraciətlərin qəbulu davam edir

Azərbaycan Prezidenti ilə Türkmənistan Prezidenti arasında videokonfrans formatında görüş keçirilib
İkinci Dünya müharibəsi iştirakçıları və digər müvafiq şəxslərə birdəfəlik maddi yardımın maliyyələşdirməsi başa çatdırılıb
Şamaxının millət vəkili Elxan Süleymanov məzunlarla görüş keçirdi.

“e-telebe.edu.az” elektron portalı vasitəsilə sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin dövlət tərəfindən ödənilməsinə dair müraciətlərin qəbulu davam edir.

Təhsil Nazirliyindən AZƏRTAC-a bildirilib ki, müraciətlərin qəbulu iyunun 11-dək aktiv olacaq. Sözügedən qrupdan olan tələbələr müraciətlərini həmin tarixədək tamamlayıb təsdiq etməlidirlər.

Nazirlik tərəfindən qeyd edilən məsələ ilə bağlı vətəndaş müraciətlərinin cavablandırılması üçün Çağrı Mərkəzinin “146-5” nömrəsi (həftəiçi 5 gün aktiv fəaliyyət göstərəcək), “e-telebe.edu.az” elektron portalının daxilində yazışma (dəstək) bölməsi xidməti təqdim edilir.

Qeyd edək ki, 2020-2021-ci tədris ilinin payız (yarımili) semestri üçün təhsil haqqı xərcləri dövlət tərəfindən ödənilən tələbələrin 2020-2021-ci tədris ilinin yaz semestri (yarımili) üçün təhsil haqqı xərclərinin dövlət tərəfindən ödənilməsi ilə bağlı “e-telebe.edu.az” elektron portalına müraciət etmələri tələb olunmur. Belə ki, həmin tələbələrin payız semestri üçün sistemdəki müraciətləri əsas götürülərək onların 2020-2021-ci tədris ilinin yaz semestri (yarımili) üçün sosial baxımdan həssas əhali qrupuna aid edilən ailələrin üzvü olması statusu elektron informasiya sistemi tərəfindən avtomatik rejimdə yoxlanılacaq, hüququ olan tələbələr üçün təhsil haqqı xərcləri təhsil müəssisələrinə ödəniləcək və bu barədə tələbələrə SMS məlumat göndəriləcək.

Sosial baxımdan həssas əhali qrupuna aid edilən ailələrin üzvü olmasına baxmayaraq sistemə müraciət etməyən və ya bu statusu yeni əldə edən tələbələr 2020-2021-ci tədris ilinin yaz semestri (yarımili) üçün təhsil haqqı xərclərinin dövlət tərəfindən ödənilməsi ilə bağlı “e-telebe.edu.az” elektron portalına mütləq qaydada müraciət etməlidirlər.

AZƏRTAC