SLESARYOV Mixail Aleksandroviç (8.5.1955, Rusiya Fed.-nın Smolensk ş. – 12.4.2014) – Azərbaycanın Milli Qəhrəmanı (12.1.1999).
1955-ci il may ayının 8-də Rusiyanın Smolensk şəhərinda doğulmuşdur. 1970-ci ildə 4 saylı Smolensk şəhər orta məktəbini bitirdikdən sonra təhsilini 19 saylı texniki-peşə məktəbində davam etdirmişdir. 1971-ci ildə o, traktorçu-maşinist kimi Smolensk Kənd Təsərrüfatı Texnikası Birliyində traktorçu işləməyə başlayır. 1975-ci ildə Sovet Ordusu sıralarına çağırılır. Hərbi xidmətini Bakıda keçirir. 1977-ci ildə xidmətini 6500 saylı hərbi hissədə başa vurub, göndərişlə Tbilisi Gizirlər Məktəbinə daxil olur. Məktəbi bitirib, yenidən Bakıya qayıdır. Əvvəlcə gizir, 1981-ci ildən 1986-cı ilə qədər motoatıcı taqımın komandiri, 1986-cı ildən 1999-cu ilin yanvar ayına qədər isə mühafilzə taqımının rəisi vəzifələrində işləyir.
Mixail Slesaryov 7 yanvar 1999-cu ildə Qobustan həbsxanasında xidməti vəzifəsini yerinə yetirirdi. Axşamüstü bir dəstə məhbus mühafizəçini tərksilah edərək həbsxanadan qaçmağa cəhd edir. Mixail Slesaryov baş vermiş hadisənin qarşısını almaq üçün cəld əməliyyat qrupu yaradır. Əməliyyat çox uğurlu keçir. Qiyamçılar yerində oturdulur. Ancaq çox təəssüf ki, arada itki də olur. Şübhəsiz ki, hadisənin qarşısı vaxtında alınmasaydı, itkilər daha çox olardı.
M.Slesaryova 1999-cu ildə kiçik leytenant rütbəsi verilmişdir.
Azərbaycan Respublikası Prezidentinin 12 yanvar 1999-cu il tarixli 73 saylı fərmanı ilə Slesaryov Mixail Aleksandroviç “Azərbaycanın Milli Qəhrəmanı” adına layiq görülmüşdür.
Ailəlidir. İki övlad atasıdır.
Əd.: Vüqar Əsgərov “Azərbaycanın Milli Qəhrəmanları” (Yenidən işlənmiş II nəşr), Bakı, 2010, səh. 264