AVCİYA-nın “Azərbaycan gəncliyi gələcəyimiz naminə: Baxış bucağı” layihəsi çərçivəsində ADPU-da ilk debat olub

AVCİYA Xaçmazda seçici hüquqlarının müdafiəsi məsələlərini müzakirə etdi
Bakıda “Körpülərin salınması” adlı beynəlxalq konfrans öz işinə başlayıb
AVCİYA: Seçkilər əvvəlki illərlə müqayisədə daha konstruktiv və demokratik olub

Azərbaycanda Vətəndaş Cəmiyyətinin İnkişafına Yardım Assosiasiyası “Azərbaycan gəncliyi gələcəyimiz naminə: Baxış bucağı” adlı layihəsinin icrasına başlayıb. Layihə çərçivəsində il ərzində tədris semestri nəzərə alınmaqla müxtəlif universitetlərdə debatlar təşkil edilməsi nəzərdə tutulur.

Bu qəbildən ilk debat martın 13-də Azərbaycan Dövlət Pedaqoji Universitetində keçirilib. ADPU-nun “Heydər Əliyev lektoriyası”nda təşkil olunan tədbiri giriş sözü ilə layihənin rəhbəri İradə Yaqubova açıb. ADPU-nun müxtəlif fakültələrinin tələbələrinin, müəllim və professorlarının iştirakı ilə təşkil olunan debatın moderatoru Orxan Cəfərov idi. Tədbirdə “Azərbaycanda yüksək ixtisaslı kadrların hazırlığında problemlər: fərdlər və cəmiyyət prizmasında” mövzusu müzakirə olunub. Tələbələrin yüksək fəallığı ilə keçən debatda Azərbaycanda pedaqoji kadrların hazırlanması, müəllim peşəsinə münasibət, gənclərin seçiminə ailənin təsiri, müəllim və şagird, müəllim və tələbə münasibətləri, xarici təcrübə mövzuları müzakirə olunub.

Tədbirin sonunda ADPU-nun dekanı, əməkdar elm xadimi, professor, Fərrux Rüstəmov, ibtidai təhsilin pedaqogikası və metodikası kafedrasının müdiri Yaqut Rzayeva, AVCİYA-nın eksperti Şahin Camalov və layihənin rəhbəri İradə Yaqubova müzakirələr zamanı qaldırılan problemlərə dair fikirlərini bildirib və tələbələrə arzu və tövsiyələrini çatdırıblar.