Akif Ənvər oğlu Həsənov Gürcüstanın azərbaycanlı icmasına mənsub ictimai-siyasi xadim, dövlət strukturlarında fəaliyyət göstərmiş şəxsdir. 1952-ci il 5 noyabr tarixində Marneuli şəhərində ziyalı ailəsində anadan olub. 1969-cu ildə Marneulidə 3 saylı azərbaycandilli orta məktəbi bitirib. 1969-1973-cü illərdə Bakıda, Azərbaycan Dövlət Pedaqoji Universiteti (o zaman N.Tusi adına İnstitut) Fizika fakültəsində təhsil alıb.
• 1973-cü ildən müəllim olaraq fəaliyyətə başlayıb. 1983-cü ildən etibarən pedaqoji sahədən çıxaraq yerli dövlət strukturlarında fəaliyyətə başlayıb. 1990-cı illərə gəldikdə, siyasi seçkilərdə iştirak edib:
• 28 oktyabr 1990-cı il tarixində Gürcüstan SSR Ali Soveti-nin deputatı seçilib. 
• 14 noyabr 1990-cı ildən 6 yanvar 1992-ci ilə qədər Gürcüstan Respublikası Ali Şurası-nın deputatı olub.
Deputat olaraq, keçirilmiş sessiyalarda ölkənin adının dəyişdirilməsi, bayraq və gerbin təsdiqi məsələlərində iştirak edib. 9 aprel 1991-ci il tarixində qəbul edilmiş “Gürcüstanın Dövlət Müstəqilliyi Aktı”na imza atan deputatlardan biridir. 
O, azərbaycanlı icmasının Gürcüstanın dövlət strukturlarında təmsil olunması və azərbaycanlıların hüquqlarının təmin olunması istiqamətində çalışıb.
Böyük dəyişikliklər dövründə dövlət orqanlarında təmsil olunmaqla etnik azlıqların hüquqlarının qorunmasına və icmalararası dialoqun inkişafına töhfə verib.
Hal-hazırda Marneulidə yaşayır və ictimai fəaliyyətlərini davam etdirir.