Bu gün Milli Məclisə noyabrın 1-ə təyin edilmiş seçkilərdə “exit-poll” keçirəcək “ELS” Müstəqil Araşdırmalar Mərkəzinin sədri İradə Yaqubova mətbuat konfransı keçirib.
APA-nın məlumatına görə, İ. Yaqubova “ELS” Müstəqil Araşdırmalar Mərkəzinin
seçkilərdə “exit-poll” keçirmək üzrə ixtisaslaşdığını, 2008-ci ildən başlayaraq, bütün seçkilərdə “exit-poll” keçirdiyini bildirib.
İ. Yaqubova Milli Məclisə seçkilərlə əlaqədar noyabrın 1-də 118 seçki dairəsi üzrə 1180 seçki məntəqəsində “exit-poll” keçirəcəklərini açıqlayıb: “Naxçıvan Muxtar Respublikası istisna olmaqla “exit-poll” Azərbaycanın bütün rayonlarını əhatə edəcək”.
“ELS” Müstəqil Araşdırmalar Mərkəzinin sədri bildirib ki, hazırda “exit-poll” keçirəcək kadrların təlimləri başa çatıb və bu gündən etibarən rayonlara müvafiq sənədlərin və ləvazimatların göndərilməsi başlayacaq. Milli Məclisə seçkilərlə əlaqədar “exit-poll”un keçirilməsinə 2600-ə qədər kadr cəlb olunacaq. Kadrlar könüllülük prinsipləri ilə fəaliyyət göstərir. İ. Yaqubova seçki günü keçiriləcək “exit-poll”la bağlı prosedurlar barədə məlumat verib. “Exit-poll”un nəticələri saat 20:00-a qədər açıqlanacaq.
“Exit-poll” “Trend” İnformasiya Agentliyinin maliyyə və informasiya dəstəyi ilə keçiriləcək. Bununla bağlı “ELS” Müstəqil Araşdırmalar Mərkəzi ilə “Trend” İnformasiya agentliyi arasında müqavilə imzalanıb və “exit-poll”un təşkili üçün 33 min manat ayrılıb.
Qeyd edək ki, Mərkəzi Seçki Komissiyasının oktyabrın 1-də keçirilən iclasında “ELS” Müstəqil Araşdırmalar Mərkəzinin Milli Məclisə noyabrın 1-də təyin edilmiş seçkilərdə “exit-poll” keçirilməsi ilə bağlı müraciətinə baxılıb və müraciətlə bağlı müsbət qərar qəbul edilib.