Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) təşkilatçılığı ilə 23-24 sentyabr 2011-ci il tarixlərində Azərbaycan Respublikasının dövlət müstəqilliyinin 20-ci ildönümü münasibətilə Bakıda beynəlxalq tədbir keçiriləcək. Tədbirdə dünyanın 58 ölkəsindən 300-dən artıq tanınmış ictimai-siyasi xadim, o cümlədən, Avropa Parlamenti, Avropa Şurası Parlament Assambleyası, ATƏT, AVRONEST, Avropa ölkələri parlamentlərinin deputatları, hazırki və keçmiş dövlət xadimləri, Nobel mükafatı laureatları, ABŞ-ın regional spikerləri, keçmiş konqresmen və senatorlar, alim və biznesmenlər iştirak edəcəklər.
Bayram tədbirində Azərbaycan Respublikasının Prezidenti cənab İlham Əliyevin iştirak və çıxış edəcəyi gözlənilir. Tədbiri AVCİYA-nın prezidenti, Şamaxının millət vəkili Elxan Süleymanov açacaq. Tədbirdə dövlət məmurları ilə yanaşı xarici qonaqların da çıxışları nəzərdə tutulub.
Tədbirlə bağlı son məlumatlar və video-görüntülər avciya.az saytında yerləşdiriləcək.